Skógartoppur ‘Belgica’ – Lonicera periclymenum ‘Belgica’
Fremur harðgerður klifurrunni/vafningsviður. Getur vafið sig upp nokkra metra upp klifurgrindur, snúrur, pergólur og tré. Blómgast síðsumars. Blómin sitja í krönsum. Rauð að utanverðu en gulleit að innanverðu. Ilma vel. Rauð ber þroskast seint á haustin ef tíð er góð. Óæt. Fremur hraðvaxinn. Þolir hálfskugga.
Tengdar plöntur
Rós ‘Helena Lykkefund’ – Rosa ‘Helena Lykkefund’
Klifurrós. Blómin meðalstór, rjómahvít, hálffyllt, ilmandi í klösum. Laufið gljáandi. Þyrnalaus. Þarf gott skjól og sólríkan stað upp við húsvegg til að þrífast. Hæð 2 - 3 m eða meir á góðum stað. Gróðursetjið í frjóan, vel framræstan jarðveg blandaðan sandi og lífrænu efni (búfjáráburður/molta). Danskt yrki frá Olsen síðan 1930.
Kattarflétta – Actinidia kolomikta – kk
All harðgerður klifurrunni. Laufin stór, hjartalaga með bleikum og hvítum skellum. Rauðir haustlitir. Blóm lítt áberandi. Getur klifrað nokkra metra upp eftir grind eða einhverju sambærilegu. Sólelsk en þolir hálfskugga. Þarf nokkurt skjól.
Rós ‘Flammentanz’ – Rosa ‘Flammentanz’
Klifurrós. Blómin stór, rauð, hálffyllt. Ilmur daufur eða enginn. Þrífst eingöngu í skjóli á móti sól í vel framræstum jarðvegi blönduðum sandi/möl og lífrænu efni (búfjáráburði/moltu). Yrki frá 6. áratug síðustu aldar frá "W. Kordes' Söhne" í Þýskalandi.
Rós ‘Pólstjarnan’ – Rosa ‘Pólstjarnan’
Harðgerð klifurrós með mörgum smáum hvítum rósum í klösum upp úr miðju sumri.
Bjarttoppur – Lonicera x tellmanniana
All harðgerður klifurrunni/vafningsviður. Laufblöð gagnstæð. Blómin rauðgul í krönsum síðsumars. Gróðursetjið upp við vegg við klifurgrind. Getur einnig klifrað upp tré og runna. Þrífst í frjósamri garðmold í skjólgóðum görðum. Sólelskur en þolir hálfskugga.
Bergflétta – Hedera helix
Sígrænn klifurrunni. Fetar sig upp veggi og trjástofna með heftirótum. Þrífst víða vel nálægt sjávarsíðunni en helst í einhverju skjóli. Skuggþolin. Getur einnig vaxið sem þekjandi runni á jörðu niðri á skjólsömum og mildum stöðum. Á áveðursömum stöðum t.d. þar sem gætir salts af hafi sviðnar laufið gjarnan mikið yfir veturinn en nær sér svo aftur sumarið á eftir.
Írabergflétta – Hedera hibernica
All harðgerður, sígrænn klifurrunni. Blöðin er talsvert stærri en á bergfléttu (H. helix), fagurgræn og gljáandi. Blóm gulgræn í kollum, aldinið svart ber. Festir sig á undirlagið með sérstökum heftirótum. Getur vaxið marga metra upp veggi og trjástofna. Skuggþolin. Þrífst best í mildu úthafsloftslagi í frjóum, rakaheldnum jarðvegi. Getur einnig vaxið með jörðinni og þakið yfirborðið þar sem aðstæður leyfa. Þolir vel klippingu.